Hikmet-95

Vikikaynak, özgür kütüphane

Evvel Hu ahir Hu deb bihud bolgıl

Hakk cemâlin körsetmese damen bolay

Zahir Hu batın Hu deb yolğa kirgil

Hakk cemâlin körsetmese damen bolay

"Lailahe illallah" dep zâri kılgıl

Hakk zikrini her kim aytsa yarı bargıl

Pir-i muğan hizmetine yügrüp yürgil

Hakk cemâlin körsetmese damen bolay

Tilge algıl "Lailahe illallah"

İçge salğıl her nefeste bolgıl agâh

Pir-i muğan nazar kılgay senge nagâh

Hakk cemâlin körsetmese damen bolay

Edhem sıfat suva bolub dünya tepgil

Kimni körseng Hızr bilib kolun öpgil

Cemâlini körey deseng seher kobğıl

Hakk cemâlin körsetmese damen bolay

Allah degen bendelerni kulı bolgıl

Tufrak sıfat yol üstide yolı bolgıl

Aşıklarnı küyüb oçgan küli bolgıl

Hakk cemâlin körsetmese damen kolay

Zâkir bolub şâkir bolub Hakk'nı süygil

Seher vaktde kopub nefsing közüng oygıl

Bayezid dek aşık bolub dünya koygıl

Hakk cemâlin körsetmese demen bolay

Yürseng-tursang, yatsarıg-kopsang Hakk'nı aytsang

Zâkir bolub şâkir bolub candın ötseng

Vallâh-Billâh dünya haram taşlab atsang

Hakk cemâlin körsetmese damen bolay

Hak vaslığa yetey deseng seher yığla

Allah teyu yürek bağrıng otka dağla

Himmet kurın can belige mehkem bağla

Hakk cemâlin körsetmese damen bolay

Edhem sıfat bu dünyadın köngil üzgil

Hırs u heva tekebbürni üyin buzgıl

Muhabbetni deryasığa çomub yüzgil

Hakk cemâlin körsetmese damen bolay

Keçe kündüz ahiretni gamın yegil

Tün uykunı haram kılıb taat kılgıl

Muhabbetni şevki birle köksüng yargıl

Hakk cemâlin körsetmese damen bolay

Ehl-i heva menmenlikdin kaçıb yürgil

Ehlin tabsang közde yaşıng saçıb yürgil

Muhabbetni şarabıdın içib yürgil

Hakk cemâlin körsetmese damen bolay

Eyâ dostlar bu dünyadın yığlab ötüng

Fâni turur bu dünyadın keçib keting

Muhabbetning câmın alıb mey nûş eting

Hakk cemâlin körsetmese damen bolay

Keçe Allah kündüz Allah tınmay aytgıl

Keçeleri bidâr bolub kanlar yutgıl

Bu dünyanı izzetlerin taşlab ötgil

Hakk cemâlin körsetmese damen bolay

Pir-i muğan etegini muhkem tutgıl

Marifetni bazarıda özüng satgıl

Mey nuş etip sema kılıb zikrin aytgıl

Hakk cemâlin körsetmese damen bolay

"Yâ Rabbenâ zalemnâ" dep nâle kılğıl

Köz yaşıngnı her tarafga jale kılğıl

Hakk yâdını aytıb özüng vâle kılğıl

Hakk cemâlin körsetmese damen bolay

Derd-i halet peydâ kılıb yolğa kirgil

Pervane dek şem'ni körüb özüng urgıl

Kayda barsang zikrin aytıb dükan kurgıl

Hakk cemâlin körsetmese damen bolay

Muhabbetni meydanıda baş ornatsang

Hû-Hû teyü zikrin aytıb can kıynasang

Didar tileb kan yaş töküb zâr ingreseng

Hakk cemâlin körsetmese damen bolay

Erenlerni astanesin saklap yatkıl

Seherlerde çarzarb urub erte kobgıl

Zâri kılıb fena bolub candın ötgil

Hakk cemâlin körsetmese damen bolay

Tufrak sıfat harlık tartkıl nefsing ölsün

Halk içinde rüsva bolgıl alem külsün

Çın köngülde yığlab körgil Hüda bilsın

Hakk cemâlin körsetmese damen bolay

Köz yaşıngnı derya kılğıl rahmı kelsin

Garib bolub yolda yatgıl kolung alsın

Pinhan yürüb tâat kılğıl Tengri bilsin

Hakk cemâlin körsetmese damen bolay

Hicran tüni ahıng birlen otlar yakkıl

Köz yaşıngnı berki birle çakmak akkıl

Erenlerni sohbetide erib akkıl

Hakk cemâlin körsetmese damen bolay

Ey nâinsaf dünya fâni Hakk'a yanğıl

Bende bolsang Hakk zikrini tınmay aytğıl

Pir-i muğan hizmetide cefa tartgıl

Hakk cemâlin körsetmese damen bolay

Allah teyu fena bolgıl bağrıng küysün

Tünler kobub taat kılgıl Tengri süysün

Andın songra has buzruklar nazar kılsun

Hakk cemalin körsetmese darnen bolay

Tün-keçeler bidâr bolub seher turgıl

Aşık bolsang İsmail dek candın ötgil

Kol-ayağıng mehkem boğub emrin tutgıl

Hakk cemâlin körsetmese damen bolay

Riyâzetni kattığ tartıb canlar kıyna

Meydan içre başıng berib başıng oyna

Ayşdın keçib mal omıga zakkum çeyne

Hakk cemâlin körsetmese damen bolay

Ferhad sıfat mihnet tartıb tağlar kesgil

Bayezid dek tünler kobub özüng asgıl

Cüneyd dek çöller kezib harlar basgıl

Hakk cemâlin körsetmese damen bolay

Hakk rahmeti uluğ derya bir katre bes

Katresidin behre alğan kılmas heves

Mavu menlik sendin keter misli meges

Hakk cemâlin körsetmese damen bolay

Hakk rahmeti uluğ derya kabil bolğıl

Talib erseng Hakk sarığa mâyil bolğıl

Zühd ü takva dâim kılıb nâil bolğıl

Hakk cemalin körsetmese damen bolay

"Lâ-Lâ" aytıb "illallah"ğa şeydâ bolğıl

Mansur sıfat "Ene’l-Hakk' deb gavğa kılğıl

Giryan bolub köz yaşıngnı derya kılğıl

Hakk cemâlin körsetmese damen bolay

Ey bîhaber gaflet birle uykudasan

Dünya tileb keçe kündüz kayğudasan

Tâ'at kılmay sözler sözleb bihûdesen

Hakk cemâlin körsetmese damen bolay

Taşdın töşek-yastuk kılıb ta'at kılsang

Hakk emriğe râzı bolub boyun sunsang

Öler vaktde iman arığ kolğa alsang

Hakk cemâlin körsetmese damen bolay

Kul Hâce Ahmed nasihatnı özüge kıl

Ey bîhaber halknı koyub özüngni bil

Tağdın ağır günahıng bâr özüngge kel

Hakk cemâlin körsetmese damen bolay

Kaynak: "Divan-ı Hikmet orijinal metin (II. Kısım)". sufism.20m.com. 6 Aralık 2010 tarihinde kaynağından arşivlendi. 
Telif durumu:

Bu eser, başka bir eserin bilimsel olmayan metodlarla oluşturulmuş bir transkripsiyonu veya faksimilesi olup ana eserden bağımsız bir telif hakkı korumasına sahip değildir. 5846 sayılı Fikir ve Sanat Eserleri Kanunu'un işlenmiş eserleri tanımlayan 6. maddesine göre; henüz yayımlanmamış olan bir eserin ilmi araştırma ve çalışma neticesinde yayımlanmaya elverişli hale getirilmesi (ilmi bir araştırma ve çalışma mahsulü olmayan alelade transkripsiyonlarla faksimileler istisna olmak üzere) halinde oluşturulan eser telif korumasına tâbi olacaktır. Ancak bu eser kanunun gösterdiği istisna kapsamında olduğundan kamu malıdır.